Voir cette Page en FrançaisHiwar avec nous!Page D Accueil
 حياتي المسيحية  يسوع المسيح  الكتاب المقدس  الإنجيل  سماعي بالدارجة  مواضيع مختلفة  الملتقى  مواقعنا المفضلة
 
 



يسر و يشرف كنيسة أن تقدم لكم هذا الشريط الذي هو عبارة عن حوار بين مغربيين أحدهما مسيحي و الأخر غير مسيحي و كلنا أمل أن يكون هذا الشريط سبب بركة و نعمة لكثيرين أمين !


أواحد السلام عليكم

و عليكم السلام ، أفين هاذ الغوايب ؟

أغير فالدنيا ، فهاذ الصبح تلقيت مع شي واحد كان كيسول على شي بلاصة وديتو ليلها و فطريقنا جبدنا الحديت على الدين وتصاب مسيحي و تكلمنا شوية على الدنوب و تأثيرهم على الإنسان و قلت أنا باش تمحي دنوبك عليك تقوم بزاف ديال الحوايج بحال الصلاة و الصوم والزكاه والصدقة و تكون كتدير الخير فالأخرين ولكن هو ما كانش متافق معايا و معرفتش مزيان الفكرة ديالو و لهاد الشي قصدت أنت باش تزيد تشرح لي كيفاش هاد المسيحية كتعالج مشكل ديال الدنوب .

فالاول كنشكر الله اللي عطاك الفرصة باش تتكلم على المسيحية و باش تكون عندك رغبة تعرف فين كاين الحق وهادي شي حاجة مزيانة محيت خاص كل إنسان باش يبحت على الحق فين كاين و إلى بغى الإنسان ينجح ف المسعى ديالو خاصو يطلب داك الشي من الله لأن الله وحدو اللي كيعرف الحق وهو وحدو اللي قادر يشرد الإنسان، و ثانيا مشكل الدنوب أي الخطيئة هو أكبر مشكل كاين فحياة البشرية و أقدم مشكل وهو أصل الحالة اللي حنا فيها .

كيفاش ؟

مكيخفاش عليك أن الأب الأصلي هو أدم ، و أدم كان كيعيش ف الجنة و كان الله عاطيه كلشي وكان كيتمتع مزيان بالخيرات ديال الجنة ولكن بعد الخطيئتة ديالو تطرد من الجنة وإلى بغيتي تعرف مزيان القصة ديال أدم و العصيان ديالو لأوامر الله و النتيجة ديال داك الشي نشوفو ف الكتاب المقدس فالتكوين الأصحاح ,1:3-7 و التكوين الأصحاح 9:3-15.

واش عندك الكتاب المقدس دابا؟

إيه كاين

واخا أرا انقرا دابا [القراءة]

ودابا شنو فهمتي من هاد الشي ؟

اللي فهمت هو أن الحية ستاطعت باش تغري حواء و طمعتها إلى كلات من الشجرة غادي تبدى تعرف الخير والشر و فعلا ستاجب أدم وحواء لإغراء الحية والله عاقبهم و طردهم من الجنة وهاد الشي راني كنعرفو

أمزيان منين كتعرف هاد الشي وكتعرف أن الحية هي الشيطان اللي ستاطع باش يدخل لحواء من نقطة الضعف ديالها وهاكدا حنا كلنا ولينا بطبيعتنا الجسدية خطاة و النتيجتة ديال الخطيئة ديلنا طردنا الله من الجنة و إلى اتفحصنا مزيان فالأيات غادي نشوفو بأن إدم و حواء كانو عريانين و ماكانوش كيعرفو الحشومة أي الخجل لأن فداك الوقت كانو كيتصرفو بكل براءة بحال واحد الصبي كيدور عريان فالدار و مكيحسش بشي خجل و حتى الناس اللي معاه مكيديوهاش فيه و هكدا مع أدم وحواء ولكن بعد المعصية ديالهم أدم حس بالدنب و تخبع من الله محيت نكاشهت العورة ديالو وهنا كانشوفو قوة العصيان ديالو فالمعصية ديال أدم جعلات واحد الفاصل كبير ما بين الله والأنسان حتى ولا كيتخبع منو فالاول كانت العلاقة مزيانة و كان أدم من أفضل المخلوقات و أحبها لله و مزال ل دابة ولكن العلاقة تغيرت لأن الله عادل ولازم باش يعاقب أدم على الخطأ ديالو واخا الله كيبغي أدم و كيحبو وكيعزو مزيان إلا أن هاد المعزة ماشفعات لوش و خدا الجزاء ديالو وهاد الشي طبيعي فحتى شي ولد منين كيغلط مع باه كيتعاقب لأنه كيبغي ولدو وماكيبغيهش يزيد فالغلط .

عندك الحق أدم اغلط خاصو يتعاقب ولكن تفكرت واحد العبارة قالها لي داك السيد و مافهمتهاش وهي "أجرة الخظيئة هي الموت."

كيقول الكتاب المقدس أي الإنجيل فرسالة رومية الأصحاح 23:6 "لأن أجرة الخطيئة هي الموت" و فعلا بعد الغلطة ديال أدم بعد من الله من بعد ماكان قريب منو و من داك الوقت صبحات المسافة مابين الله وأدم كبيرة و ماتت العلاقة الروحية مابين أدم و الله ، و الموت في هذه الأية كيعني الموت الروحي ماشي الجسدي لأننا حنا كنعبدو الله بأرواحنا. وهكدا كانت النتيجة ديال العصيان الموت في بعدما كان أدم عايش ف الجنة تحرم من كل خيراتها و ماتت داك الحياة اللي كان كيعيش فيها ولا كيعيش بحال في مقبرة اللي هي العالم ديالنا .

بصاح إلى تصورنا الحياة ف الجنة فخاصنا انعتابرو هاد الحياة شي مقبرة ماكاين فيها غير الحروب والشر والضلم ولكن عندي واحد السؤال .

أيه يمكن ليك تسول على أي حاجة ، و أنا كنطلب من الله باش يوفقني ونواجب على كل الأسئلة ديالك .

ولكن حنا علاش كنتحملو الخطأ ديال أدم؟ حنا ماعندنا حتى شي دنب فهاد الشي .

بزاف كيسولو هاد السؤال ولكن الإجابة ديالو ساهلة محيت أدم هوالأب ديالنا. وهو كيمتل الجنس البشري أي كيمتل كل واحد فينا وستاطعت الخطيئة تدخل لقلبو وساهل على الخطيئة باش تدخل فكل واحد فينا و يمكن تقرا الرسالة إلى رومية الأصحاح 12:5

واخا صبر واحد الدقيقة. [القراءة]

شفتي دابا بأن الخطيئة أي المعصية دخلات العالم و بالخظيئة كان الموت و كان الإبتعاد على الله . و هاد الخطيئة دخلت بإنسان واحد اللي هو أدم, و من بعدو بدات كتسرب لكل واحد كيدخل لهاد العالم. و حنا كنعرفو واحد القصة اللي قريبة من أدم كتورينا بأن الإنسان ماتعلمش من الدرس ديال أدم و هاد القصة هي ديال قايين أي قابيل و هابيل. فقايين قتل خوه واخا مادار لو والو, ولكن ماقدرش قابيل يتعلم من الدرس ديال باه واخا المدة قصيرة مابين ماوقع لأدم وماوقع ل قايين. وحتى هو خدا العقاب ديالو. وحنا ماكنختالفوش لا على أدم ولا على قايين لأن ديما كنخطاو و الخظيئة عندها تأتير كبير فالحياة ديالنا. وكاينة قصة مشهورة اللي كتبين لينا أن الإنسان ماستاطعش يتغلب على الخطيئة رغم أنه كيعرف العاقبة ديالها. ف الناس ديما كيتعاماو على الدنوب في حياتهم. و هاد القصة هي ديال نوح. فالناس في أيام نوح زاد العصيان ديالهم وطغاو بزاف و كترات الأتام والشرور ديالهم. و أعمالهم غضبات الله وقرر باش يهلكهم بعدما عطاهم فرصة باش يتوبو و يرجعو لطريق, ولكن قلوبهم والخطيئة اللي تأصلت فيهم ماخلاتهمش يطيعو الله و يمتاتلو لأوامر ديالو. وأمر الله نوح باش يصوب السفينة و بين الله السخط و الغضب ديالو و سلط على داك الناس طوفان عظيم وهلك جميع البشر ماعدا نوح واللي معاه. و من بعد الطوفان بدا أدم جديد مع نوح و الدرية ديالو ولكن رغم هاد الإنسان الجديد بقات الطبيعة الخاطئة فيه و ماقدرش يتغلب عليها. و نفسو نوح اللي رضى عليه الله و كان واحد المتال عظيم على الطاعة, اخطأ واحد الخطأ كبير و نشوفو ف التكوين الأصحاح 20:9-23 .

واخا [القراءة]

واش لاحظتي هنا أن حتى الأنبياء و الناس الأتقياء كيخطئو. فرغم ماشاف نوح من هول الطوفان و الغضب ديال الله كيف داير على العصيان, ماقدرش أنه يتملك نفسو. حتى هو عصى أمر الله فكيفاش حنا نستاطعو نتغلبو على الخطيئة ف حياتنا و نقضيو عليها ؟

أنت تكلمتي على ناس دارو بزاف ديال الدنوب والخطأ و دنوبهم كانت كتيرة محيت كانو شي وحدين كيتزوجو بناتهم أو كيعبدو الأصنام و الشمس و بعض المخلوقات ومازال حتى لدابا شي وحدين كيقومو بهاد الشي, ولكن أنا كنتكلم على ناس اللي أخطائهم كتيرة بحال كيكدبو أو كيضحكو على شي واحد و شي حوايج بحال هكدا .

أه هنا المشكل ديال الإنسان هو أنه ماكيفهمش شنو هو التأتير ديال الخطيئة و شنو المعنى ديال الخطيئة ، الخطيئة أو الدنوب كيعنيو أنك عصيتي أمر الله و ستهنت ب الأوامر ديالو, ف الخطيئة إذن هي العصيان. وإلى تأملنا فالخطيئة ديال أدم هو كلى غير واحد التفاحة. واش كاين شي معصية صغر من هادي ؟ فعلا على تفاحة تطرد من الجنة. واش فداك الوقت الله شاف ف القيمة ديال التفاحة ؟

ألا ماشي على التفاحة الله طرد أدم من الجنة ، ولكن على اللي عصا لو أمرو.

أيه والله قالك ماتكدبش وإلى كذبت اعصيتي أمرو ، إذن أنت ف حكمو مطرود من الجنة .

عندك الحق ف هادي .

الله ماعندوش هادا ذنب صغير ولا ذنب كبير ولكن المهم عندو هو أنك تطيع الأوامر ديالو محيت الله بغانا نكونو بلا ذنوب طاهرين و حياتنا تكون كاملة مافيهاش شي عيب بحال اللي كان أدم .

و دابا واخا حنا كنعبدو الله و كنصليو وكنديرو الخير بزاف ، ولكن مازال التأتير ديال الخطيئة ف حياتنا .

أداك شي اللي كاين ، لأن صعيب باش نطبقو القوانين و الشرائع ، و خير دليل على دلك هو أن الله بعد ما شاف تمرد الناس عليه و شاف بأن صعيب عليهم باش يعرفو الخطيئة بأنها موجودة ف حياتهم, عطاهم وصايا على يد النبي موسى و هادي اللي كنعرفوها بالوصايا العشر. و هي موجودة ف الخروج الأصحاح 1:20-17 .

واخا . [القراءة]

اود قراءة المقطع الثاني...

 
 
يمكنك أن تكتب لنا با للغة العربية, بالإنجليزية, الفرنسية أو المازيغية - hiwar@hiwarmaroc.com